المجد للي بيقدروا رغم المواجع يفضلوا جامدين
لو حتى جوه القلب بينقط حنين
بيلفوا فوق البنج شاش
ويغلفوا القلب اللي باش
صبر و روتين
المجد للي الحب
غاية في عرفهم
عكس الخلايق كلهم
واخدينه شرع ودين
والمجد للي الحمل مال على كتفهم
شايلين هموم فوق همهم
بيسّندوا الباقيين
المجد للي العمر ساعة في وقتهم
والليل بيسمع لحنهم
بيغنوا للغايبين
والمجد للي الخوف معشش وسطهم
وبرغم قطمة وسطهم
لسه حلويين
